وفاقی وزیر اطلاعات فواد چودھری کا کہنا ہے کہ رنگ روڈ اسکینڈل میں ابھی تک کسی وزیر یا مشیر کے ملوث ہونے کا کوئی ثبوت نہیں ملا۔
وفاقی وزیر اطلاعات فواد چودھری نے ٹویٹر پیغام میں کہا ہے کہ ‏عمران خان کی حکومت میں ہی ہو سکتا تھا کہ الزامات لگیں تو تحقیقات ہوتی ہیں، نون لیگ اور پیپلز پارٹی کےدور میں میڈیا کےگلے بیٹھ جاتے تھے۔

وفاقی وزیر کا کہنا تھا کہ یہی نظام میں تبدیلی ہے کہ حکومتی اہلکاروں کو احتساب کا خوف ہونا چاہئے، ہاؤسنگ سوسایٹیز کو فائدہ پہنچانے کیلئے رنگ روڈ کو 23 کلومیٹر تک بڑھایا گیا، فیصلے سے حکومت کو 20 ارب روپے اضافی زمین کی خریداری کی مد میں دینے پڑے۔

انہوں نے کہا کہ ‏وزیر اعظم عمران خان کی احتساب پالیسی واضح ہے، وزیر اعلیٰ کو کہا گیا تحقیقات کریں۔ کمشنر راولپنڈی کو کہا گیا کہ معاملے کو دیکھیں، مزید تحقیقات کیلئے معاملہ متعلقہ اداروں کو بھیجا جائے۔