معروف عالم دین مولانا طارق جمیل کے صاحبزادے مولانا عاصم جمیل سینے پر گولی لگنے سے انتقال کر گئے، اہلخانہ کی جانب سے ان کی نماز جنازہ کا اعلان کر دیا گیا۔

ڈی ایس پی میاں چنوں نے واقعہ سے متعلق بتایا ہے کہ مولانا عاصم جمیل نے اپنے سینے پر گولی ماری، ان کو تشویشناک حالت میں تلمبہ رورل ہیلتھ سنٹر پہنچایا گیا جہاں پر وہ جان کی بازی ہار گئے۔

پولیس حکام نے مزید بتایا کہ مولانا عاصم جمیل کی خود کشی کی تاحال کوئی وجہ سامنے نہیں آ سکی، واقعہ سے متعلق تحقیقات کر رہے ہیں۔

دوسری جانب مولانا طارق جمیل نے نماز جنازہ کا اعلان کرتے ہوئے کہا ہے کہ میرے مرحوم بیٹے عاصم جمیل کی نمازِ جنازہ آج بروز سوموار 30 اکتوبر رات ساڑھے 7 بجے ہمارے آبائی گاؤں رئیس آباد تلمبہ میں ادا کی جائے گی۔

مولانا طارق جمیل کی عوام سے دعاؤں کی اپیل

جوان بیٹے کے انتقال پر مولانا طارق جمیل نے اپنے ٹوئٹر پیغام میں کہا ہے کہ آج تلمبہ میں میرے بیٹے عاصم جمیل کا انتقال ہو گیا، اس حادثاتی موت نے ماحول کو سوگوار بنا دیا ہے۔

انہوں نے مزید کہا ہے کہ آپ سب سے گزارش ہے کہ اس غم کے موقع پر ہمیں اپنی دعاؤں میں یاد رکھیں، اللہ میرے فرزند کو جنت الفردوس میں اعلیٰ مقام عطا فرمائے۔

آئی جی پنجاب نے واقعہ کا نوٹس لے لیا

آئی جی پنجاب ڈاکٹر عثمان انور نے مولانا طارق جمیل کے بیٹے کے مبینہ طور پر گولی لگنے سے انتقال کر جانے کے واقعہ کا نوٹس لے لیا۔

آئی جی پنجاب نے آر پی او ملتان سے رپورٹ طلب کرتے ہوئے کہا ہے کہ شواہد اور فرانزک رپورٹ کی روشنی میں موت کی وجوہات کا تعین کیا جائے۔

دوسری جانب مولانا طارق جمیل کے صاحبزادے کے انتقال پر مختلف سیاسی شخصیات نے اظہار تعزیت کیا ہے۔

شہباز شریف

صدر مسلم لیگ (ن) شہباز شریف نے کہا کہ جواں سالہ فرزند عاصم جمیل کی وفات پر مولانا طارق جمیل صاحب اور ان کے اہل خانہ سے دلی دکھ اور افسوس کا اظہار کرتا ہوں، یہ ایک ناقابل برداشت غم ہے۔

نگران وزیراعلیٰ سندھ جسٹس (ر) مقبول باقر

نگران وزیر اعلیٰ سندھ جسٹس (ر) مقبول باقر نے مولانا طارق جمیل کے صاحبزادے کے انتقال پر گہرے دکھ کا اظہار کیا اور سوگوار خاندان کے صبر، مرحوم کے بلند درجات کیلئے دعا کی۔

سپیکر قومی اسمبلی راجہ پرویز اشرف

سپیکر قومی اسمبلی راجہ پرویز اشرف نے مولانا طارق جمیل کے فرزند کے انتقال پر اظہار تعزیت کیا اور مرحوم کے بلندی درجات کیلئے دعا کی۔

نگران وفاقی وزیر اطلاعات مرتضیٰ سولنگی

نگران وفاقی وزیر اطلاعات مرتضیٰ سولنگی نے عالم دین مولانا طارق جمیل کے بیٹے مولانا عاصم جمیل کے انتقال پر اظہار افسوس اور مولانا طارق جمیل اور اہل خانہ سے اظہار تعزیت کیا۔

گورنر سندھ کامران خان ٹیسوری

گورنرسندھ کامران خان ٹیسوری نے مولانا طارق جمیل کے صاحبزادے کے انتقال کے اندوہناک واقعہ پر اظہار تعزیت کیا اور کہا کہ اللہ تعالیٰ مرحوم کے درجات بلند کرے اور لواحقین کو صبر جمیل عطا فرمائے۔

71 مناظر