سی سی پی او لاہور بلال صدیق کمیانہ نے مصری شاہ کے علاقے میں 18 سالہ نوجوان مبین کاشف کی پتنگ کی ڈور سے ہلاکت پر سخت ایکشن لیتے ہوئے ایس ایچ او مصری شاہ سب انسپکٹرخرم شہزاد کو عہدے سے فوری معطل کرکے لائن حاضر کر دیا ہے۔سی سی پی او بلال صدیق کمیانہ نے ایس پی صدر ڈویژن کو ایس ایچ او مصری شاہ سب انسپکٹر خرم شہزاد کے خلاف مذید محکمانہ انکوائری کی ہدایت کی ہے۔ بلال صدیق کمیانہ نے ایس ڈی پی او مصری شاہ حسن عزیز کی جواب طلبی کے احکامات جاری کئے۔علاوہ ازیں سربراہ لاہور پولیس بلال صدیق کمیانہ نے ایس پی سٹی اخلاق اللہ کو بھی لیٹر آف ڈسپیلئر جاری کر دیا۔سی سی پی او لاہور نے کہا ہےپتنگ بازی پر زیرو ٹالرنس ہے۔انہوں نے خبردار کیا کہ پتنگ بازی کے واقعات میں قیمتی انسانی جان کے ضیاع پر متعلقہ ایس ایچ اوز اور ڈی ایس پیز کے خلاف محکمانہ کاروائی ہو گی اور انہیں جواب دہ ہونا ہو گا۔پولیس افسران پتنگ بازی ایکٹ پر عملدرآمد یقینی بنائیں۔سربراہ لاہور پولیس بلال صدیق کمیانہ نے والدین سے اپیل کی ہے کہ وہ اپنے بچوں کو پتنگ بازی کے خونی کھیل سے دور رکھیں۔ترجمان لاہور پولیس کے مطابق لاہور پولیس پتنگ بازی ایکٹ کی خلاف ورزی پر رواں سال 2770 سے زائد مقدمات درج کئےہیں۔ ہزاروں کی تعداد میں پتنگیں اور ڈوربرامد کر چکی ہے۔رواں ماہ پتنگ بازوں کے خلاف 686 مقدمات درج کیے گئے۔