ملک بھر میں امریکی ڈالر کی قیمت میں یکدم بڑا اضافہ ریکارڈ کیا گیا جبکہ پاکستان سٹاک مارکیٹ میں بدترین مندی کے باعث سرمایہ کاروں کے اربوں روپے ڈوب گئے۔

سٹیٹ بینک آف پاکستان کی سماجی رابطے کی ویب سائٹ ٹویٹر پر جاری کردہ اعداد و شمار کے مطابق رواں ہفتے کے پہلے کاروباری روز کے دوران انٹر بینک میں روپے کے مقابلے میں امریکی ڈالر کی قیمت میں 76 پیسے کا بڑا اضافہ دیکھا گیا۔

اعداد و شمار کے مطابق روپے کے مقابلے میں امریکی ڈالر کی قیمت 174 روپے 71 پیسے سے بڑھ کر 175 روپے 47 پیسے ہو گئی ہے
دوسری طرف پاکستان سٹاک مارکیٹ میں بدترین مندی ریکارڈ کی گئی، 100 انڈیکس 435.28 پوائنٹس گر کر 45644.09 پوائنٹس کی سطح پر پہنچ کر بند ہوا، پورے کاروباری روز کے دوران کاروبار میں 0.94 فیصد کی تنزلی دیکھی گئی جبکہ 7 کروڑ 18 لاکھ 46 ہزار 276 شیئرز کا لین دین ہوا جس کے باعث سرمایہ کاروں کو 100 ارب روپے کے قریب نقصان برداشت کرنا پڑا۔