چین نے ایران اور امریکہ پر زور دیا ہے کہ وہ امن مذاکرات میں حاصل ہونے والی پیش رفت اور مثبت رفتار کو برقرار رکھیں اور بات چیت کو مزید آگے بڑھائیں۔
چینی وزارتِ خارجہ کے ترجمان گو جیا کن نے کہا کہ چین امید کرتا ہے کہ ایران اور امریکہ مذاکرات کے ذریعے مثبت نتائج کے حصول کے لیے اپنی کوششیں جاری رکھیں گے۔
گو جیاکن نے سوئٹزرلینڈ میں ہونے والے ایران-امریکہ مذاکرات کے حوالے سے پاکستان، قطر اور دیگر فریقین کی ثالثی کوششوں کی بھی حمایت کا اظہار کیا۔
انہوں نے کہا کہ چین پاکستان، قطر اور تمام متعلقہ فریقوں کی ثالثی اور سفارتی کوششوں کی حمایت کرتا ہے۔
چینی ترجمان کے یہ ریمارکس اس وقت سامنے آئے ہیں جب پاکستان اور قطر نے سوئٹزرلینڈ میں ہونے والے اعلیٰ سطحی مذاکرات کے پہلے دور کے اختتام پر امریکہ اور ایران کے درمیان جاری سفارتی رابطوں میں اہم پیش رفت کا اعلان کیا ہے۔
چین نے اس بات پر زور دیا کہ مذاکرات اور سفارت کاری ہی مسائل کے پائیدار اور پُرامن حل کا بہترین راستہ ہیں، اور تمام فریقین کو کشیدگی میں کمی اور باہمی اعتماد کے فروغ کے لیے مل کر کام کرنا چاہئے۔