وزیراعلیٰ پنجاب مریم نواز شریف نے ایشین انفراسٹرکچر انویسٹمنٹ بینک (اے آئی آئی بی) کو پنجاب میں ڈویلپمنٹ پراجیکٹ میں شراکت داری کی پیشکش کر دی۔
وزیراعلی پنجاب مریم نوازشریف سے ایشین انفراسٹرکچر انویسٹمنٹ بینک کے چیف انویسٹمنٹ آفیسر کونسٹ نٹین لیمیٹوسکی نے ملاقات کی، ڈائریکٹر جنرل ژاؤہونگ یانگ بھی اس موقع پر موجود تھیں۔

ملاقا ت میں باہمی دلچسپی کے امور ادارہ جاتی تعاون بڑھانے پر تبادلہ خیال کیا گیا، وزیراعلیٰ مریم نوازشریف نے پنجاب میں ریکارڈ ترقیاتی منصوبوں سے متعلق آگاہ کیا۔

مریم نواز شریف نے ایشین انفراسٹرکچر انویسٹمنٹ بینک کو پنجاب میں ڈویلپمنٹ پراجیکٹ میں شراکت داری کی پیش کش کی۔

اس موقع پر وزیراعلیٰ پنجاب مریم نواز شریف کا کہنا تھا کہ باکو اربن فورم کے 13 ویں سیشن میں پنجاب حکومت کے اپنی چھت، اپنا گھر پروگرام کو سراہا گیا، اپنی چھت، اپنا گھر پروگرام کے تحت ایک سال میں ایک لاکھ سے زائد گھر بن چکے ہیں، پنجاب کے ہر حصے میں الیکٹرک بس اور ای بائیک پروگرام کامیابی سے جاری ہے۔

انہوں نے کہا کہ ایشین انفراسٹرکچر انویسٹمنٹ بینک کے چیف انویسٹمنٹ آفیسر کونسٹ نٹین لیمیٹوسکی کو پاکستان کے ثقافتی ہب لاہور میں آمد پر خوش آمدید کہتے ہیں، پنجاب کے ساتھ ایشین انفراسٹرکچر انویسٹمنٹ بینک کی شراکت کو قدر کی نگاہ سے دیکھتے ہیں۔

ان کا کہنا تھا کہ لاہور میں پانی اور صفائی کے بنیادی ڈھانچے میں بہتری کیلئے ایم او یو پر دستخط کرنے پر ایشین انفراسٹرکچر انویسٹمنٹ بینک کے تعاون کو سراہتے ہیں، باہمی معاہدے پنجاب کی ترقی اور اصلاحاتی ایجنڈے ایشین انفراسٹرکچر انویسٹمنٹ بینک کے اعتماد کا مظہر ہے۔

مریم نوازشریف نے کہا کہ لاہور ویسٹ واٹر اینڈ ڈرینج مینجمنٹ پروجیکٹ سیوریج نیٹ ورک اور بابو صابو میں ویسٹ واٹر ٹریٹمنٹ پلانٹ سے ڈرینج سسٹم میں بہتری آئے گی، ایشین انفراسٹرکچر انویسٹمنٹ بینک سے تعاون اربن کلچر میں مثبت تبدیلی کا باعث ہوگا۔

وزیراعلیٰ پنجاب کا کہنا تھا کہ بی آر بی ڈی کینال میں مجوزہ سرفیس واٹر ٹریٹمنٹ پلانٹ کیلئے ایشین انفراسٹرکچر انویسٹمنٹ بینک کا تعاون قابل قدر ہے، ماحولیاتی تحفظ اور صحت عامہ میں بہتری کی طرف تیزی سے گامزن ہیں۔

انہوں نے مزید کہا کہ پنجاب نئے شہری طرز حکمرانی کے ماڈل کی طرف بڑھ رہا ہے، ڈیٹا پلاننگ، ٹیکنالوجی مانیٹرنگ اور موسمیاتی سمارٹ انفراسٹرکچر سے عوام کے طرز زندگی میں بہتری آئے گی، صاف پانی، صحت اور بہترین ٹرانسپورٹ سسٹم پنجاب حکومت کی ترجیحات میں شامل ہے۔