امریکی بحریہ کا طیارہ بردار بحری جہاز یو ایس ایس جیرالڈ آر فورڈ آئندہ چند روز میں مشرق وسطیٰ سے روانہ ہو کر وطن واپسی کا سفر شروع کرے گا۔
خبر ایجنسی کے مطابق جیرالڈ آر فورڈ کی واپسی سے امریکی فائر پاور کم ہوجائے گی، بحری بیڑے کی واپسی سے امریکہ اور ایران کے درمیان جنگ مستقل طور پر ختم ہونے کے امکانات بڑھ گئے ہیں۔

امریکی حکام کے مطابق یہ فیصلہ ایسے وقت میں کیا گیا ہے جب امریکہ اور ایران کے درمیان امن مذاکرات تعطل کا شکار ہیں، یہ پیشرفت 4,500 امریکی اہلکاروں کیلئے کسی حد تک ریلیف کا باعث ہوگی جو گزشتہ 10 ماہ سے تعینات ہیں، تاہم اس سے خطے میں امریکی فوجی طاقت میں نمایاں کمی واقع ہوگی۔

یو ایس ایس جیرالڈ آر فورڈ اس وقت خطے میں موجود 3 طیارہ بردار بحری جہازوں میں سے ایک ہے جبکہ دیگر 2 یو ایس ایس جارج ایچ ڈبلیو بش اور یو ایس ایس ابراہم لنکن ہیں، ایران کے ساتھ کشیدگی کے دوران یہ بحری جہاز مختلف علاقوں میں تعینات رہے ہیں۔

امریکی طیارہ بردار جہاز فورڈ اس وقت بحیرہ احمر میں موجود ہے، جبکہ لنکن اور بش بحیرہ عرب میں آپریشنز انجام دے رہے ہیں، جن کا مقصد امریکی پابندیوں کے نفاذ کے تحت مخصوص جہازوں کی نگرانی اور روک تھام کرنا ہے۔

تجزیہ کاروں کے مطابق فورڈ کی واپسی سے خطے میں امریکی عسکری موجودگی میں کمی آئے گی، جو جاری کشیدگی اور سست روی کا شکار سفارتی کوششوں کے تناظر میں اہم پیشرفت سمجھی جا رہی ہے۔