چیئرمین پی سی بی محسن نقوی نے کہا ہے کہ وزیراعظم شہباز شریف نے پاکستان سپر لیگ (پی ایس ایل) کے 11ویں ایڈیشن کے فائنل میں شائقینِ کرکٹ کو اسٹیڈیم آنے کی اجازت دے دی ہے۔
سماجی رابطے کی ویب سائٹ پر جاری بیان میں محسن نقوی نے بتایا کہ انہوں نے وزیراعظم سے تماشائیوں کو اسٹیڈیم میں داخلے کی اجازت دینے کی درخواست کی تھی، وزیراعظم خود بھی شائقین کو اجازت دینے کے حق میں تھے، تاہم ملک میں جاری کفایت شعاری مہم کے باعث احتیاطی اقدامات پر زور دیا جا رہا ہے۔

محسن نقوی نے مزید کہا کہ فرنچائز مالکان کی درخواست پر وزیراعظم نے پی ایس ایل 11 کے فائنل کے لیے شائقین کو اسٹیڈیم آنے کی خصوصی اجازت دی۔

چیئرمین پی سی بی محسن نقوی نے اس فیصلے پر وزیراعظم کا شکریہ بھی ادا کیا۔

واضح رہے کہ مشرق وسطیٰ میں کشیدگی اور ایران امریکا تنازع کے تناظر میں ممکنہ تیل بحران کے پیش نظر حکومتِ پاکستان نے ملک بھر میں کفایت شعاری مہم شروع کر رکھی ہے، جس کے تحت ایندھن کے استعمال میں کمی لانے کی کوششیں جاری ہیں۔